Tʋ "bo Kea nɩɛ 'beɔ ɛ ‑kwɛi
99
Tʋ "bo nɩɛ 'beɔ: 'blʋa 'a ‑su' a i.Nyiɔ crɛ', ɛ ‑teɛ i 'de selibɛn'a "kpei.
2 Tʋ "bo nɩɛ klaa" 'de Selisalɛmʋ,
ɛ nɩɛ 'de 'blʋa ‑wee'‑ "klein "jru kpɔ'.
3 Nyʋ ‑wee'‑ "klein 'bɛɛ‑ ɛɛ' 'nynɩ klaa" ke,
ɛɛ' wɔnkma 'nynɩ "i, ɛ ‑kwɛi.
4 Tʋ "bo kma "i, ‑wɛe ɛɛ 'je "isrɛtɩ‑ 'a "dia,
kɩɩn, ɛmɛ ‑bla' kɛ', "isrɛa ke
‑maa' di ‑topin ‑nɩa 'de Sakɔbʋ 'ʋn ɛ, ɛmɛ ‑nʋɛ'.
5 Ao ‑sa Tʋ "bo ‑nɩa ‑aa Kea 'nynɩ,
ao "sii 'kɔu‑ i 'de ɛ "juɛi. Dɛ ‑nʋɛ, ɛ ‑kwɛi.
6 Moisɩ ke, Arɔn ke,
ʋʋ nɩɛ 'e 'sraa ‑saʋn "klu,
Samiɛ nɩ 'e nyʋ ‑ʋʋa poɛ ‑tooi" "klu,
‑wɛe Tʋ "bo kpʋn ʋʋpʋ‑ 'a baewlu‑.
7 'De bue" 'ʋn mɔ ɛɛ wlu 'de ʋʋpʋ‑ ‑pee;
ʋʋ 'jeɛ ɛɛ' kɛ' wɔn, ‑wɛe ʋʋ kpʋn ɛɛ' 'srɩn i.
8 'Oo Tʋ "bo, ‑aa Kea,
ɛmɛ ‑kpʋn' ʋʋpʋ‑ 'a baewlu,
‑wɛe ‑ɛɛ ‑wlʋa ʋʋa' ‑kwɔ "kpei ɛ,
'kaa ɛ ‑sa ʋʋpʋ‑ kplɩn saɩn ‑mɩ kwai.
9 Ao ‑sa Tʋ "bo ‑nɩa ‑aa Kea 'nynɩ,
'de ao "sii 'kɔu‑ i, 'de ɛɛ' crʋ ‑kwea i "kpei;
dɛ ‑nʋɛ Tʋ "bo nɩɛ ‑aa Kea ‑ɛ ‑kwea i ‑o.